Bandillo 50

Bumabayo sa hangin

ang mga nakakuyom

at nakatanghal na

bisig at kamao;

sumusulong ang mga

yabag na lumilikha

ng maliit-malaking

burol at bundok ng

rumaragasang daluyong;

nagngingitngit-umiimpit

ang mga ngipin sa

isa’t isa habang

ang mata’y animo’y

Bagong Buwan-

pumipiglas ang mga ugat

at waring mata ng Diyos

na lumuluha ng dugo,

nakakakilabot at

nakakalambot ng laman,

buto at bungo;

telon ang katahimikan

ang pagsabog ay palakpakan

ang hiyaw ay silbato

ang tangis ay atas

ang sakit ay talas

ang hapdi ay bigwas

at ang pagbagsak ay hudyat

ng pagsilang ng alamat.

*Ang salitang bandillo ay nangangahulugang “town crier” o tagapagpabalita sa bayan-bayan; regular na kolum ni Randy Malayao ang bandillo sa Nordis, isang lingguhan at panrehiyunal na pahayagan sa Hilagang Luson.

Si Rene Boy Abiva ay dating bilanggong politikal at awtor ng Tuligsa at iba pang mga tula (2018).