PinoyAbrod.net

Libu-libong mamamayan ang nakiisa sa United Peoples SONA noong July 23 upang sama-samang kundenahin ang mga pahirap na polisiya sa ilalim ng rehimeng Duterte. Nariyan ang iba’t ibang panawagan: ang tigilan ang pambabastos ni Duterte sa mga kababaihan, pagtutol sa Cha-Cha, pagbasura sa kontraktwalisasyon, pagtigil ng martial law sa Mindanao, at marami pang iba. Iisang tunguhin kung bakit nagkaisa ang sambayanang Pilipino, at ito ay ang paglaban sa diktadurang ipinapataw ng administrasyong Duterte.

Pagpalayas sa militar. Iyan ang tanging panawagan ng 65 taong gulang na si Benjamin Cruz nang tanungin namin siya hinggil sa kanyang dahilan kung bakit siya sumama sa SONA. Si Benjamin ay mula sa Timog Katagalugan at isa sa mga naglakbayan ng limang araw patungong Maynila upang higit na mairehistro ang kanilang mga hinaing.

“Gusto naming maging malaya sa aming pupuntahang lugar, kasi natatakot kami sa mga militar,” wika ni Benjamin. Pinagbibintangan sila ng mga militar na sila ay mga myembro ng New Peoples Army (NPA), kung kaya’t ganung na lamang ang takot na dala ng presensya ng mga militar sa kanilang komunidad.

“Humihingi kami ng panawagan, alamin sana ng Presidente kung sino ang sibilyan na tao kasi nadadamay kami,” hiling ni Benjamin para sa Pangulo.

Tirik na tirik ang araw, kung kaya’t kitang-kita ko sa mukha ni Tatay ang pagod mula pa lamang ng kanilang paglalakbay. Kitang-kita ko rin sa kanyang mamula-mulang mata kung gaano na sila pinahihirapan ng tumitinding militarisasyon sa kanilang komunidad. Kaya’t tanging pakikiisa sa kanilang panawagan ang naging tugon ko.

The post #SONA2018: Benjamin appeared first on Manila Today.

Kasabay ng pagdaraos ng ikatlong State of the Nation Address ng Pangulong Rodrigo Duterte ang pagbuhos ng maraming panawagan ng iba’t ibang sektor ng lipunan.

Kabilang sa maraming nagprotesta ang sektor ng mga manggagawa, mag-aaral, katutubo at magsasaka. Ayon sa panayam kay Yumi Catameo,magsasaka sa lalawigan ng Rizal at miyembro ng Pambansang Kilusan ng mga Samahang Magsasaka (PAKISAMA), isa siya sa maraming biktima ng mga kontra-mahirap na mga polisiya ng administrasyon.

Ani rin ng magsasaka, nais nilang matugunan ng administrasyon ang matagal na nilang nilalaban na isyu sa coco levy fund kung saan nakasaad na ang bilyong-bilyong pondo ay dapat nakalaan sa mahihirap na magsasaka ngunit napunta lamang sa bulsa ng mga makapangyarihan.

“Kini-claim namin na ang coco levy funds ay maipamahagi na sa lalong madaling panahon upang mabiyayaan naman kaming mga maliliit na magsasaka,” dagdag pa ng miyembro ng PAKISAMA.

Base sa panayam, mahigpit niya ring kinikondena ang militarisasyon na nagaganap laban sa mga katutubo kung saan kinakamkam ng mga militar ang lupang ninuno ng mga ito kaya nagmimistulang nomad ang mga katutubo.

Dagdag pa ni Catameo, hinihiling nila sa Pangulo na maibigay nito ang naaangkop sa batas nang ito ay nalalaan naman sa mga katulad nilang magsasaka.

Sinasalamin ng ganitong mga pahayag ang mga danas at laban ng mga magsasaka upang makamit ang katarungang pilit na ipinagkakait sa kanila sa loob ng mahabang panahon.

The post #SONA2018: Yumi appeared first on Manila Today.

Inihakbang ni Jonathan Doringo sampu ng kanyang mga kasamahan sa Sun Logistics Labor Union mula sa Southern Tagalog ang kanilang mga paa papunta sa Kamaynilaan upang makiisa sa SONA ng Bayan.

Wika niya, “ Nakikiisa kami ngayon araw na ‘to sa kapwa namin Pilipino upang ipanawagan sa estado ang pagbabasura sa kontraktwalisasyon at ang TRAIN Law na ‘yan na talagang pasakit sa aming mga manggagawa.”

“Nais din naming ipanawagan ang dagdag sahod at magkaroon ng national minimum wage. Kasi alam naman natin ang totoo. Hindi nakakabuhay ang sahod sa probinsya. Isa pa ang pinakasinisigaw talaga namin ang pagbabasura sa TRAIN Law dahil ‘yan talaga ang pahirap hindi lamang sa aming mga manggagawa, pati na rin sa mamamayang Pilipino,” dagdag pa niya.

Isa si Mang Jonathan sa libu-libong Pilipino na nagdudurusa dahil sa TRAIN Law na ipinasa ni Pangulong Duterte. Hindi raw ito nakakatulong sa mga manggagawa bagkus ito’y nagpahirap pa lalo sa kanilang mahirap na kalagayan.

“Kaya naman sumama kami rito sapagkat sobra-sobra na ang mga kasinungalingan ng estado. Sobra-sobra na ang pagpapahirap.  Imbis na protektahan ang interes naming mga manggagawa ay hinahayaan lang nila na alipustahin kami ng mga kapitalista na ‘yan,” wika ni Mang Jonathan.

Sa huli may iniwang hamon si Mang Jonathan sa mga kabataan, kapwa manggagawa, at sa sambayanang Pilipino:

Ang hamon ko sa mga kabataan na sumama at nakiisa sa SONA ngayon ay magmulat pa ng maraming kabataan upang isulong ang interes ng mamamayan. Nanawagan din kami na panahon na para muling magkaisa ang lahat upang isulong ang interes ng mamamayan.

The post #SONA2018: Jonathan appeared first on Manila Today.